SB San Rafael, Nagsagawa ng Inspeksyon sa Resort sa BMA-Balagtas

Upang matiyak ang kaligtasan ng mga mamamayan at pagsunod sa mga lokal na ordinansa, isinagawa ng Sangguniang Bayan ng San Rafael ang isang ocular inspection sa isang pribadong resort sa Barangay BMA-Balagtas.

Ang nasabing operasyon ay pinangunahan ng ating Pangalawang Punong Bayan Kgg. Edison "Kuya Edison" Veneracion, katuwang ang mga kagalang-galang na Kagawad ng Sangguniang Bayan. Ang hakbang na ito ay bahagi ng mandato ng lehislatura na suriin ang mga establisyimento sa bayan, lalo na ngayong panahon ng tag-init kung kailan dagsa ang mga bakasyunista.

Pangunahing layunin ng inspeksyon na masiguro na ang resort ay sumusunod sa mga umiiral na alituntunin sa konstruksyon, zoning, at higit sa lahat, ang mga safety protocols para sa mga swimming pools at pasilidad. Ayon kay Vice Mayor Edison, mahalagang mapanatili ang kaayusan at kaligtasan upang maiwasan ang anumang aksidente at masiguro ang positibong karanasan ng publiko.

Sa ilalim ng pamumuno ni Punong Bayan Kgg. Cipriano "Goto" Violago, Jr., patuloy ang lokal na pamahalaan sa pagbabantay sa mga negosyong pang-turismo. Ang mga ganitong pagbisita ay nagsisilbing gabay sa mga business owners upang maitama ang kanilang mga kakulangan at makapagbigay ng de-kalidad na serbisyo sa mga San Rafaeleño at mga bisitang mula sa ibang bayan.

Ang tagumpay ng inspeksyong ito ay bahagi ng adhikain ng pamahalaang bayan na itaguyod ang isang maunlad at ligtas na turismo sa San Rafael na tumutugon sa lahat ng legal na pamantayan.