Vice Mayor Edison Veneracion, Nakiisa sa Ikalawang VMLP Monthly Meeting

Upang mas mapagtibay ang pagkakaisa at pagtutulungan ng mga lokal na mambabatas sa lalawigan, nakiisa ang ating Pangalawang Punong Bayan Kgg. Edison "Kuya Edison" Veneracion sa ginanap na Ikalawang Monthly Meeting ng Vice Mayors’ League of the Philippines (VMLP) – Bulacan Chapter noong ika-16 ng Marso, 2026.

Ang pagtitipon, na ginanap sa bayan ng San Ildefonso, ay dinaluhan ng mga bise mayor mula sa iba’t ibang munisipyo at lungsod ng Bulacan. Pangunahing layunin ng nasabing league meeting ang pagpapalakas ng ugnayan ng mga Pangalawang Punong Bayan upang masiguro ang mas mabilis at epektibong paghahatid ng serbisyo sa kani-kanilang mga nasasakupan.

Sa loob ng pulong, nagkaroon ng pagkakataon ang mga opisyal na magbahagi ng kani-kanilang mga karanasan, "best practices," at mga bagong kaalaman sa paggawa ng mga polisiya at ordinansa. Ayon kay Vice Mayor Edison, ang mga ganitong diskusyon ay mahalaga upang makakuha ng mga bagong ideya na maaaring ipatupad sa Sangguniang Bayan ng San Rafael para sa ikabubuti ng mga mamamayan.

Katuwang ang Pamahalaang Bayan ng San Rafael sa pangunguna ni Mayor Cipriano "Goto" Violago, Jr., nananatiling aktibo si Vice Mayor Edison sa pakikilahok sa mga panlalawigang organisasyon upang masiguro na ang ating bayan ay laging updated sa mga bagong programa at inisyatiba ng pamahalaang panlalawigan at pambansa.

Ang tagumpay ng pagtitipong ito ay sumasalamin sa matatag na pundasyon ng kooperasyon sa pagitan ng mga pinuno ng Bulacan tungo sa iisang mithiing gawing mas progresibo ang buong lalawigan.