Summer Sports Clinic 2026, Matagumpay na Nagsimula

Sa layuning linangin ang potensyal ng mga kabataang San Rafaeleño sa larangan ng palakasan, matagumpay na isinasagawa ang San Rafael Summer Sports Clinic 2026.

Bilang bahagi ng pagsubaybay sa nasabing programa, personal na bumisita ang LYDO Officer na si Erl Veneracion sa mga sports workshop upang makita ang takbo ng mga pagsasanay at makasalamuha ang mga kalahok. Sa kanyang pagbisita, kapansin-pansin ang sigasig, determinasyon, at aktibong pakikilahok ng mga kabataan sa iba’t ibang sports.

Ang programang ito ay hindi lamang naglalayong tumuklas ng mga bagong atleta, kundi nagsisilbi ring mabisang oportunidad upang mahubog ang karakter ng mga kabataan. Binigyang-diin ng pamunuan na ang sports clinic ay mahalaga sa pagpapaunlad ng pisikal na kakayahan, pakikipagkapwa-tao, teamwork, at sportsmanship.

Sa pamamagitan ng paglahok sa mga ganitong aktibidad, nahahasa ang mga kabataan na maging disiplinado at responsableng mamamayan. Ang bawat laro at pagsasanay ay nagtuturo ng mahahalagang aral na magagamit nila hindi lamang sa loob ng court o field, kundi maging sa kanilang pang-araw-araw na buhay.

Patuloy ang suporta ng Pamahalaang Bayan ng San Rafael sa mga programang naglalayong bigyan ng makabuluhang aktibidad ang kabataan ngayong bakasyon, upang matiyak na sila ay magiging produktibo at malusog na bahagi ng ating lipunan.