SB San Rafael, Ininspeksyon ang Ipinapatayong Globe Tower

Upang matiyak ang kaligtasan ng mga residente at ang pagsunod sa mga teknikal na pamantayan ng konstruksyon, nagsagawa ng isang ocular inspection ang Sangguniang Bayan ng San Rafael sa itinatayong Globe Tower sa Barangay Salapungan.

Ang nasabing operasyon ay pinangunahan ng Pangalawang Punong Bayan Kgg. Edison "Kuya Edison" Veneracion, katuwang ang mga kagalang-galang na Kagawad ng Sangguniang Bayan. Layunin ng pagbisitang ito na personal na masuri ang kalagayan ng pasilidad at tiyakin na ang lokasyon at istraktura nito ay naaayon sa mga umiiral na regulasyon para sa kaligtasan at kapakanan ng mga mamamayan sa paligid.

Ayon kay Vice Mayor Edison, mahalaga ang pagpapalakas ng komunikasyon sa bayan, ngunit dapat itong balanse sa pagsisiguro na ang bawat imprastraktura ay dumaan sa tamang proseso at ligtas ang pundasyon. "Ang ating tungkulin ay protektahan ang ating mga kababayan habang itinataguyod ang pag-unlad ng teknolohiya sa ating komunidad," aniya.

Sa ilalim ng pamumuno ni Punong Bayan Kgg. Cipriano "Goto" Violago, Jr., patuloy ang lokal na pamahalaan sa pagbabantay sa mga malalaking proyekto sa bawat barangay. Katuwang ang Municipal Engineering Office, sinisiguro ng Sangguniang Bayan na may sapat na distansya at proteksyon ang mga ganitong pasilidad para sa katahimikan at seguridad ng mga karatig-kabahayan.

Ang hakbang na ito ay bahagi ng adhikain ng pamahalaang bayan na itaguyod ang isang disiplinado, maayos, at ligtas na San Rafael para sa lahat ng mga mamamayan nito.