Sangguniang Bayan ng San Rafael, Nag-ocular Inspection sa Poblacion Gym, Brgy. Hall, at Baywalk

Upang matiyak ang kalidad at maayos na implementasyon ng mga proyektong pang-imprastraktura sa bayan, nagsagawa ng serye ng Ocular Inspection ang Sangguniang Bayan ng San Rafael sa iba't ibang mahahalagang pasilidad sa Barangay Poblacion.

Personal na binisita at ininspeksyon ng mga miyembro ng lokal na lehislatura ang Poblacion Gymnasium, Poblacion Barangay Hall, at ang kasalukuyang isinasagawang Baywalk Development sa naturang lugar.

Pangunahing layunin ng isinagawang inspeksyon na masusing masuri ang progreso ng mga konstruksyon. Nais din ng Sanggunian na masiguro na ang bawat yugto ng pagtatayo ay naipatutupad nang tama at alinsunod sa mga itinakdang plano, pamantayan, at regulasyon ng Pamahalaang Bayan ng San Rafael.

Sa pamamagitan ng pag-monitor na ito, masisiguro ng pamahalaang lokal na sulit ang pondo ng bayan at ligtas na pakikinabangan ng mga mamamayan ang mga bagong pasilidad kapag natapos na ang mga ito. Ang Baywalk Development, partikular, ay inaasahang magiging bagong atraksyon at pasyalan na magbibigay ng karagdagang ganda at sigla sa turismo ng Barangay Poblacion.

Ayon sa Sangguniang Bayan, patuloy ang kanilang gagawing pagbabantay at pag-inspeksyon sa mga proyekto sa iba't ibang barangay bilang bahagi ng kanilang tungkulin na itaguyod ang transparansya, pananagutan, at de-kalidad na serbisyo para sa lahat ng San Rafaeleño.