San Rafaeleño, Tayo na’t Makiisa sa Earth Hour 2026 Ngayong March 28!

Bilang bahagi ng pandaigdigang pagkilos laban sa pagbabago ng klima, ang Pamahalaang Bayan ng San Rafael ay kaisa sa pagdiriwang ng Earth Hour 2026 na gaganapin ngayong darating na Sabado, ika-28 ng Marso.

Mula 8:30 PM hanggang 9:30 PM, hinihikayat nina Mayor Cipriano "Goto" Violago, Jr. at Vice Mayor Edison "Kuya Edison" Veneracion ang lahat ng mga San Rafaeleño na pansamantalang patayin ang mga ilaw at iba pang kagamitang de-kuryente sa kani-kanilang mga tahanan at establisyimento.

Ang Earth Hour ay isang mahalagang inisyatiba na naglalayong itaas ang antas ng kamalayan ng publiko tungkol sa pangangalaga sa kalikasan at ang epekto ng global warming. Ang simpleng pagtitipid ng enerhiya sa loob ng isang oras ay isang makapangyarihang simbolo ng ating pagkakaisa at malasakit para sa kaligtasan ng ating mundo.

"Ang bawat patay ng ilaw ay isang hakbang patungo sa mas maliwanag na kinabukasan para sa ating mga anak. Ipakita natin na ang San Rafael ay may malasakit sa Inang Kalikasan," anang lokal na pamahalaan.

Inaanyayahan din ang lahat na ibahagi ang inyong pakikiisa sa pamamagitan ng pag-post ng inyong mga larawan habang isinasagawa ang Earth Hour sa inyong lugar. Gamitin ang mga opisyal na hashtag na #EarthHour2026inSRB at #LetsGOTOSanRafael.