Progreso ng Bagong Gusali sa Munisipyo, Masusing Sinuri ng Sangguniang Bayan

Upang matiyak ang kalidad at kaligtasan ng mga itinatayong imprastraktura sa bayan, nagsagawa ng isang ocular inspection sina Punong Bayan Kgg. Cipriano "Goto" Violago, Jr. at Pangalawang Punong Bayan Kgg. Edison "Kuya Edison" Veneracion sa ginagawang bagong gusali sa loob ng Government Center.

Katuwang ang mga Kagawad ng Sangguniang Bayan, personal na nilibot ng mga opisyal ang bawat bahagi ng konstruksyon upang masuri ang kasalukuyang progreso ng proyekto. Ang hakbang na ito ay bahagi ng mandato ng lokal na pamahalaan na bantayan ang paggamit ng pondo ng bayan at tiyakin na ang mga proyekto ay natatapos sa takdang panahon.

Pangunahing layunin ng inspeksyon na masiguro ang mahigpit na pagsunod sa mga itinakdang pamantayan sa engineering at safety protocols. Ayon kay Mayor Goto, mahalagang maging matibay ang mga pasilidad na ito dahil ito ay gagamitin para sa mas mabilis at komportableng paghahatid ng serbisyo sa mga mamamayang San Rafaeleño.