Pakikiisa sa World Down Syndrome Day, Isinulong

Kasabay ng buong mundo, nakiisa ang Pamahalaang Bayan ng San Rafael sa paggunita ng World Down Syndrome Day ngayong araw, ika-21 ng Marso.

Ang espesyal na araw na ito ay nagsisilbing paalala sa bawat isa na ang lahat ng tao, anuman ang kanilang pisikal o mental na kalagayan, ay may angking kakayahan, natatanging talento, at mahalagang papel na ginagampanan sa ating lipunan.

Sa ilalim ng pamumuno nina Punong Bayan Kgg. Cipriano "Goto" Violago, Jr. at Pangalawang Punong Bayan Kgg. Edison "Kuya Edison" Veneracion, patuloy na isinusulong ng ating bayan ang isang inklusibong komunidad kung saan ang pag-unawa at paggalang ang nanaig.

"Ang ating mga kababayang may Down Syndrome ay bahagi ng ating pamilya at ng ating bayan. Layunin nating matiyak na sila ay may sapat na suporta, pagkalinga, at oportunidad upang maipakita ang kanilang galing," anang mensahe mula sa lokal na pamahalaan.

Katuwang ang Municipal Social Welfare and Development Office (MSWDO) at ang PDAO, nananatiling prayoridad ng administrasyong Violago-Veneracion ang mga programang naglalayong protektahan ang karapatan ng mga Persons with Disabilities (PWDs) at bigyan sila ng puwang upang makilahok sa mga aktibidad ng bayan.

Hinihikayat ang lahat ng mga San Rafaeleño na makiisa sa pagpapalaganap ng tamang impormasyon at pag-alis ng stigma upang sama-sama nating mabuo ang isang lipunang walang diskriminasyon.