MENRO San Rafael, Nagpaalala sa Iskedyul at Tamang Pagbubukod ng Basura

Upang mapanatili ang kalinisan, kaayusan, at kalusugan ng kapaligiran sa buong bayan, muling nagpalabas ng isang mahalagang paalala ang Municipal Environment and Natural Resources Office (MENRO) San Rafael ukol sa tamang sistema ng pagtatapon ng basura.

Binigyang-diin ng MENRO na mahigpit na ipatutupad ang nakatakdang iskedyul ng paghahakot ng basura sa bawat barangay. Ayon sa ahensya, nakabukod ang araw ng koleksyon para sa mga basurang nabubulok (biodegradable) at hindi nabubulok (non-biodegradable).

Kaugnay nito, nakiusap at nanawagan ang lokal na pamahalaan sa lahat ng mga mamamayang San Rafaeleño na maging disiplinado at sundin ang tamang waste segregation policy. Inaasahan na ilalabas lamang ng mga residente ang kanilang mga basura sa mismong araw ng paghakot sa kanilang lugar upang maiwasan ang pagkalat nito sa mga lansangan at ang pagdami ng mga peste.

Ang hakbang na ito ay bahagi ng patuloy na kampanya ng Pamahalaang Bayan na itaguyod ang isang "Green and Clean San Rafael." Sa pamamagitan ng simpleng pakikiisa at tamang pagbubukod ng basura mula sa loob ng bawat tahanan, malaki ang maitutulong nito upang mapangalagaan ang kalikasan at mapanatiling maunlad at malinis ang buong komunidad.