Libreng School Supplies, Ipinamahagi ng Pamahalaang Bayan sa mga Day Care Children

Upang mas mapalakas ang edukasyon ng mga kabataan sa kanilang murang edad, matagumpay na isinagawa ang pamamahagi ng mga libreng school supplies para sa mga mag-aaral ng Early Childhood Care and Development (ECCD) sa buong bayan.

Ang mahalagang inisyatibong ito ay personal na pinangunahan ni Punong Bayan Kgg. Cipriano "Goto" D. Violago, Jr., bilang bahagi ng kaniyang patuloy na adbokasiya na unahin ang kapakanan at pag-aaral ng mga batang San Rafaeleño.

Ang malawakang pamamahagi ay pinangasiwaan ng Municipal Social Welfare and Development (MSWD), katuwang ang mga dedikadong Day Care Teachers at ilang pinuno at kawani ng lokal na pamahalaan na naglaan ng kanilang oras upang masigurong maayos na makakarating ang mga kagamitan sa bawat benepisyaryo.

Layunin ng simpleng handog na ito na gumaan ang gastusin ng mga magulang at mas lalong ganahan ang mga bata sa pagpasok sa eskwela. Sa pamamagitan ng mga bagong kagamitan, inaasahan na mas mahuhubog ang kakayahan at interes ng mga mag-aaral habang sila ay nagsisimula pa lamang sa kanilang akademikong paglalakbay.

Ayon sa lokal na pamahalaan, ang programang ito ay malinaw na patunay ng walang sawang malasakit ng administrasyong Violago sa sektor ng edukasyon, lalo na sa mga maliliit na bata na siyang pag-asa at kinabukasan ng bayan ng San Rafael.