Ipatatayong Rentable Stalls sa Coral na Bato, Sinalang sa Public Hearing at Inspeksyon ng Sangguniang Bayan

Upang masiguro ang maayos na pag-unlad ng lokal na negosyo at pagsunod sa mga pamantayan ng batas, nagsagawa ng Pampublikong Pagdinig at Ocular Inspection ang Sangguniang Bayan sa Barangay Coral na Bato nitong ika-8 ng Hunyo, 2026.

Ang aktibidad ay pinangunahan ni Kgg. Nestor Vicho bilang Chairman ng Committee on Public Works & Infrastructure, kasama si Pangalawang Punongbayan Kgg. Edison M. Veneracion at mga miyembro ng konseho.

Isinagawa ang pagdinig at inspeksyon bilang tugon sa pormal na kahilingan ni Bb. Shirley Torres Cruz. Layunin nitong ma-isyuhan ng kaukulang Sangguniang Bayan Clearance ang kaniyang ipapatayong rentable stalls o mga paupahang pwesto na may kabuuang sukat na 500 square meters na matatagpuan sa naturang barangay.

Bilang bahagi ng mahigpit na proseso, dinaluhan din ng Sanggunian ang isang ocular inspection upang personal na suriin ang lokasyon at tiyaking ligtas, angkop sa zoning ordinance, at walang magiging balakid sa daloy ng trapiko o kaligtasan ng publiko sa lugar.

Ayon sa lokal na lehislatura, ang mga ganitong hakbang ay mahalaga upang balansehin ang paglago ng komersyo sa San Rafael habang pinapanatili ang kaayusan at kapakanan ng mga residenteng nakapaligid sa mga itinatayong istraktura.