Ika-10 Regular Session: Budget ng mga Barangay at SK, Pinagtibay ng Sangguniang Bayan

Tuloy-tuloy ang paggulong ng mga programa at serbisyo sa bawat komunidad matapos ang matagumpay na Ika-10 na Pangkaraniwang Pagpupulong ng Sangguniang Bayan ng San Rafael. Ang sesyon ay pinangunahan ng ating Pangalawang Punong Bayan Kgg. Edison M. Veneracion katuwang ang mga Kagalang-galang na Kagawad.

Sa nasabing pagpupulong, sumailalim sa ikatlo at huling pagbasa ang mga mahahalagang kapasiyahan na naglalayong suportahan ang operasyon at mga proyekto ng iba't ibang barangay at Sangguniang Kabataan (SK) para sa Taong 2026.

Kabilang sa mga napagtibay ang Annual Budget ng mga sumusunod na lokal na yunit:

• Barangay: Cruz na Daan (₱4.2M), Caingin (₱18.5M), Mabalas-balas (₱8.2M), Maronquillo (₱7.9M), Tambubong (₱13.5M), at Sampaloc (₱10.6M).

• Sangguniang Kabataan: Poblacion, Salapungan, Pasong Intsik, Talacsan, at Dagat-dagatan.

Bukod sa mga usaping pampinansyal, inaprubahan din ang clearance para sa konstruksyon ng Novicio Family Hall sa Barangay Salapungan, na magsisilbing karagdagang pasilidad sa nasabing lugar.

Ayon kay Vice Mayor Veneracion, ang mabilis at masusing pagpasa sa mga budget na ito ay mahalaga upang matiyak na hindi maantala ang mga serbisyong panlipunan, imprastraktura, at mga programa para sa kabataan sa bawat sulok ng San Rafael. Ito ay bahagi ng tapat at epektibong pamamahala nina Mayor Cipriano "Goto" Violago, Jr. at ng buong Sangguniang Bayan.