Capacity Development Training, Isinagawa sa San Rafael

Upang higit na paigtingin ang kampanya para sa kalinisan at wastong pangangalaga sa kalikasan, matagumpay na idinaos ang Capacity Development Training on RA 9003 noong ika-23 hanggang 24 ng Marso, 2026.

Ginanap ang dalawang araw na pagsasanay sa 3rd Floor ng Municipal Building sa Sampaloc, San Rafael, na may temang “Strengthening Barangay Leadership on Environmental Governance and MRF Management.” Ang aktibidad ay dinaluhan ng mga lider mula sa iba’t ibang barangay upang mas mapalakas ang kanilang kaalaman sa implementasyon ng Republic Act 9003 o ang Ecological Solid Waste Management Act.

Pangunahing layunin ng training na ito na bigyan ng sapat na kakayahan ang mga opisyal sa wastong pamamahala ng basura at ang epektibong pagpapatakbo ng mga Materials Recovery Facility (MRF) sa kani-kanilang nasasakupan. Sa pamamagitan nito, masisiguro na ang bawat barangay ay may sistematikong paraan ng segregation at pagreresiklo.

Ayon sa pamunuan nina Punong Bayan Kgg. Cipriano "Goto" Violago, Jr. at Pangalawang Punong Bayan Kgg. Edison "Kuya Edison" Veneracion, ang pakikipagtulungan ng mga barangay leaders ay krusyal upang makamit ang isang "Zero Waste" na komunidad. "Ang disiplina sa basura ay nagsisimula sa tamang pamumuno at kaalaman. Sa ating sama-samang pagkilos, mas mapapanatili nating malinis at maayos ang ating mahal na bayan," anang mensahe mula sa lokal na pamahalaan.

Katuwang ang Municipal Environment and Natural Resources Office (MENRO), patuloy na maglulunsad ang San Rafael ng mga kahalintulad na programa upang matiyak na ang bawat sulok ng munisipyo ay sumusunod sa mga pamantayang pangkalikasan ng bansa.