Pakikilahok ng Publiko, Susi sa Mas Maunlad na San Rafael ayon kay Mayor Violago

Muling pinagtibay ni Punong Bayan Kgg. Cipriano "Goto" D. Violago, Jr. na nananatiling isang bukas na daan ang kaniyang tanggapan upang pakinggan at bigyang-pansin ang boses ng bawat isang San Rafaeleño.

Ayon kay Mayor Violago, malugod na tinatanggap ng kaniyang opisina ang lahat ng uri ng pakikipag-ugnayan mula sa publiko—mula sa mga kababayang nangangailangan ng tulong, mga nagbabahagi ng mungkahi, hanggang sa mga grupong naglalapit ng mga programa at adhikaing may layuning iangat ang antas ng pamumuhay sa bayan.

Nagpaabot din ng taos-pusong pasasalamat ang alkalde para sa patuloy na pagtitiwala at pakikiisa ng mga mamamayan. Binigyang-diin niya na ang bawat pagbisita, ideya, at suhestiyon ng mga residente ay mahalagang bahagi ng kaniyang administrasyon upang makapaghatid ng mas maayos, makatao, at makabuluhang serbisyo-publiko para sa lahat.

Naniniwala ang punong bayan na sa pamamagitan ng pagkakaisa, bukas na komunikasyon, at aktibong pakikilahok ng bawat isa, mas mapagtitibay ang isang gobyernong tunay na naglilingkod para sa kapakanan ng mamamayan at mas mapapabilis ang pagbuo ng isang mas maunlad at mas maayos na San Rafael.