Paghahanda sa mga Hamon: Mayor Goto Violago, Nagpatawag ng Pagpupulong sa mga Department Heads

Sa gitna ng mga hamong kinakaharap ng bansa, partikular na ang banta ng pagtaas ng presyo ng petrolyo at mga pangunahing bilihin, nagpatawag ng isang mahalagang pagpupulong si Punong Bayan Kgg. Cipriano "Goto" Violago, Jr. para sa lahat ng mga Department Heads at Section Chiefs ng ating munisipyo.

Pangunahing tinalakay sa nasabing strategic meeting ang mga konkretong hakbang at pagpaplano upang mapanatili ang katatagan ng lokal na pamahalaan. Binigyang-diin ni Mayor Violago ang kahalagahan ng maagap at maayos na koordinasyon sa pagitan ng bawat tanggapan. Layunin nito na matiyak na hindi maantala ang paghahatid ng mga pangunahing serbisyo publiko sa kabila ng mga panlabas na suliraning pang-ekonomiya.

Bukod sa usapin ng langis, tinalakay din ang pagpapaigting ng mga lokal na programa sa pangkabuhayan at seguridad sa pagkain upang masiguro na sapat ang suportang natatanggap ng bawat pamilya sa San Rafael. Kaisa rin sa nasabing adhikain si Vice Mayor Edison "Kuya Edison" Veneracion at ang buong Sangguniang Bayan upang magbigay ng kaukulang suportang pambatas sa mga ilalatag na solusyon.