412 Pamilyang Benepisyaryo ng 4Ps sa San Rafael, Pormal nang Nakapagtapos

Isang malaking tagumpay para sa bayan ang opisyal na pagtatapos ng 412 pamilyang benepisyaryo ng Pantawid Pamilyang Pilipino Program (4Ps) na binigyang-pugay sa idinaos na "Pugay Tagumpay 2026."

Ang naturang aktibidad ay isang selebrasyon para sa mga pamilyang nakamit na ang antas ng self-sufficiency o ang kakayahang tumayo sa sariling mga paa tungo sa mas maayos at masaganang antas ng pamumuhay.

Nakiisa at nagbigay-kulay sa okasyon sina Gng. Gaudencia M. Tinagan (DSWD SWAD Bulacan Provincial Link at Provincial Team Leader), G. Avelino R. James, Jr. (Social Welfare Assistant III), at ang Municipal Action Team ng San Rafael, kasama ang iba't ibang ahensya at stakeholders na patuloy na sumusuporta sa mga programang umaalalay sa pamilyang Pilipino.

Ang makasaysayang tagumpay na ito ay naging posible sa pamamagitan ng walang sawang suporta ng Pamahalaang Bayan ng San Rafael sa ilalim ng pamumuno ni Punong Bayan Kgg. Cipriano "Goto" D. Violago, Jr. Ang kaniyang administrasyon ay nananatiling nakatutok sa pagbibigay-lakas sa mga pamilya sa pamamagitan ng mga inklusibong programa, inisyatiba para sa pag-unlad ng lipunan, at matibay na ugnayan sa komunidad.

Ayon sa pamunuan, higit sa isang seremonya ng pagtatapos, ang Pugay Tagumpay ay patunay ng sipag, katatagan, at pag-asa ng mga mamamayan. Sinasalamin din nito ang matagumpay na pagtutulungan ng DSWD, ng lokal na pamahalaan, at ng buong komunidad upang gabayan ang mga pamilya tungo sa isang mas maliwanag na kinabukasan.