2,000 Sako ng Certified Rice Seeds, Ipinamahagi ng Pamahalaang Bayan sa mga Magsasaka

Upang patuloy na alalayan ang mga lokal na bayani ng bukid at tiyakin ang masaganang ani, matagumpay na naipamahagi ang 2,000 sako ng certified rice seeds sa mga kwalipikadong magsasaka sa buong bayan ng San Rafael.

Ang malawakang pamamahagi ay pinangunahan ng ating Punong Bayan, Kgg. Cipriano "Goto" D. Violago, Jr., kasama ang iba pang mga opisyal at pinuno ng pamahalaang lokal na kaisa sa pagsusulong ng kapakanan ng mga magsasaka.

Ang mahalagang programang ito ay isinagawa sa ilalim ng pangangasiwa ng Municipal Agriculture Office (MAO). Layunin ng inisyatiba na maibsan ang gastusin ng mga lokal na magsasaka sa kanilang pagtatanim at lalo pang mapataas ang kalidad at dami ng produksyon ng palay sa buong bayan.

Ayon kay Mayor Violago, ang pagbibigay ng de-kalidad at sertipikadong binhi ay bahagi ng kaniyang pangmatagalang komitment na gawing sentro ng matatag na agrikultura ang San Rafael upang masiguro ang sapat na pagkain para sa bawat pamilya.

Para sa mga magsasakang may karagdagang katanungan o nais mag-inquire ukol sa mga susunod na programa ng pagsasaka, maaari kayong magpadala ng mensahe sa opisyal na Facebook page ng Municipal Agriculture Office o bumisita mismo sa kanilang tanggapan sa pamahalaang bayan.