MDRRMO San Rafael, Naghatid ng Kaalaman sa Disaster Preparedness

Bilang bahagi ng paghahanda para sa ligtas at maayos na pagbubukas ng klase, matagumpay na naisakatuparan ang isang Disaster Preparedness and Awareness Orientation sa Caingin Elementary School.

Ang aktibidad ay isinagawa katuwang ang Municipal Disaster Risk Reduction and Management Office (MDRRMO) San Rafael na nakiisa at nagbahagi ng mahahalagang kaalaman sa mga guro, magulang, at mga boluntaryo bilang suporta sa taunang pagdaraos ng Brigada Eskwela 2026.

Sa pamamagitan ng oryentasyong ito, tinalakay ng mga kinatawan ng MDRRMO ang mga tamang hakbang at paunang lunas na dapat gawin sa panahon ng sakuna gaya ng lindol, bagyo, at sunog. Layunin ng programa na armasan ng tamang kaalaman ang komunidad ng paaralan upang maging handa sa anumang emergency.

Ayon sa pamunuan ng paaralan at lokal na pamahalaan, malaking bagay ang ganitong mga inisyatibo dahil kapag ligtas ang paaralan, nagiging payapa ang kaisipan ng bawat magulang at mag-aaral. Sa tulong at pagkakaisa ng buong komunidad, patuloy ang Pamahalaang Bayan ng San Rafael sa pagbuo ng isang matatag, resilient, at laging handang bayan para sa kinabukasan ng kabataan.